بمناسبة عيدالثّورة، سامحوني بمناسبة عيد الإنفجار الثّوري الغير مسبوق، تعدّدت طرق الإحياء والإحتفال: كلّ حدّ حسب موقعو وإمكانيّاتو وصحّتو ! أنا خوكم ماني "مرترت" وراجل كبير وأنا والخروج في البرد خطّان متوازيان لا يلتقيان أبدا وإذا تلاقاوا راهو بسبب قوّة قاهرة بتكليف من السّلطة العليا في الدّار، إلي هي بالمناسبة عادلة وما تكلّفني كان بالمهام إلّ على قدّ إمكانيّاتي وعادة ما تفوتش قضية من الحومة... عاد نهار 17 / 12 المجيد، كان عندي الأمر اليومي )تلقّيتُ نسخة منه يوم 16 / 12 مساءً( ومُفاده : تِمشي تقضي من الحومة وتجيب كذا وكذا قبل ما تُغطس في المتابعة المُزدوجة بين القنوات التّلفزيّة والفايسبوكيّة واِنجّم نأكّدلكم إلّ ما عندي حتّى هامش مناورة ولا خُطط بديلة بإعتبار أنّ مصدر الفرمان ماعندوش وين يدور الرّيح خاصّة كيف يبدا القْريب مفسّدلو أخلاقو! هاني قلتلكم وماني خوكم ما تقولوش لصاحبة السّلطة القائمة في الدّار... الحاصيلو، هزّيت هاك القفيفة وشريت ما أمكن )وكان قليل على خاطر الأسوام حتّى في الأحياء الشّعبيّة نار( لكن في الشّارع، ما كان فمّة حتّى دليل على أنّو يوم عيد وطني! وجوه مكشبرة وناس تدور هايمة وحتّى في القهوة كعبتين وكعبة. يحبّ يقول لا سمعت شكون فرحان لا شكون غضبان! تقولش عليه فمّة زوز عوالم: واحد تلفزي-فايس بوكي والآخر لاهي في حاجات أخرى ما عندها حتّى علاقة لا بالإنقلاب أو التّصحيح، لا بدستور قديم أو جديد! شيء! والو! ما بدا يوصلني طشّ وجود "عيد الثّورة" كان في ثنيّتي وأنا راجع للدّار وعرضني سي الرّوج ماشي هاك الوقت باش يشري شويّة خبز... وبطبيعة الحال عرضني وهو chargé à bloc ، واخذ دوزتو متاع الأخبار ومتاع التوقّعات للنّهار هذاكة! بصراحة، وقتها حسّيت بوطأة العيش تحت سلطة قايمة تحكم بالفرمانات وحسدت الرّوج ! ومن غير مانطوّل عليكم، حلّيت التّلفزة والفايس بوك وقرّرت باش نتلافى النّقص. أوّل حاجة، في القنوات الأجنبيّة وخاصّة الخليجيّة،لقيت بثّ مباشر من شارع بورقْيبة والأنهج المُجاورة وفي الفايس بوك حكايات وأجواء الشّارع في مهد الإنفجار الثّوري! وبما أنّي نبّار ومُعترِف، ركّزت الحقيقة على إلّ صاير في شارع بورقْيبة. لقيت الأمور كيف العادة تقريبا: الشّارع مقسّم مربّعات ومستطيلات ومثلّثات وكلّ الأشكال والفواصل هي باريارات الحديد والبوليسيّة. قدّام المسرح البلدي كانوا فيه جماعة مساندة قرارات الرّئيس واخذين راحتهم ومُحتفلين وخطابات وغناء... يقول القائل: هاذم علاش ما خذاوش فضاء كبير : ملعب وإلّ ساحة كبيرة وعملوا فيها مهرجانهم؟ علاش ما مشاوش لسيدي بوزيد واحتفلوا بالإنفجار في موقع الإنفجار الثّوري بالذّات؟ اللّهمّ، تكون فمّة نيّة بناء مشهد قلبه هو مدارج وواجهة المسرح البلدي وأطرافه هي الأطياف إلّ تعارض قيس سعيّد وضمنيًّا، ومهما كان عددهم، هم في موقع "الفرايجيّة" والمتفرّج في كلّ الحالات ما ينجّمش يغيّ النصّ،ما ينجّم كان يتفاعل بالتّصفيق وإلّ بالتّصفير وربّما حتّى بال"قصف" بالطّماطم، لكن توّة صعيب شويّة مدام الطمطومة سومها غالي! وبين قوسين، راهو حتّى وقت حكم النّهضة،كانت هي ووزراءها ونوّابها وحلفاءها يعملوا منصّات كبيرة في وسط شارع بورقْيبة ويجيبوا فنّانينهم وخطباءهم ومضخّمات الصّوت )في إحياء 14 جانفي( يعني من ناحية تواجد مساندي السّلطة بالشّارع في نفس الوقت إلّ كانت تتظاهر فيه قوى المعارضة، مش حاجة جديدة ! نرجعو للمشهد متاع 17 / 12 / 2021 في شارع بورقْيبة، جماعة التيّار-الجمهوري-التكتّل، ما خلّوهمش يدخلوا وبعد أخذ وردّ، إظطرّوا يرجعوا لقدّام مقرّ جريدة الموقف ويعملوا نقطة إعلاميّة للتّنديد بمنعهم من التّظاهر. أمّا المجموعة الثّالثة، مجموعة "مواطنون ضدّ الإنقلاب" كانوا متمركزين في المساحة المحيطة بقنطرة الجمهوريّة. المجموعة هذي، إلّ انبثقت عليها "المبادرة الدّيمقراطيّة" تظاهرت بقيادة منسّقها الأستاذ جوهر بن مبارك وحوله وجوه أخرى منها الحبيب بوعجيلة وسميرة الشوّاشي ورضا بلحاج وآخرون كالسيّدة شيماء عيسى... والحقيقة أنّو كيف الواحد يشوف الأسامي تصيبو البهتة! توّة آش جاب سميرة الشوّاشي لجوهر بن مبارك وإلاّ لشيماء عيسى؟ الأولى وين الحكم وين هي حتّى لوكان تحت جناح شيخ التّنظيم الإخواني بتونس ولا فايدة من الرّجوع لكيفاش وصلت لموقع نائبة أولى لرئيس المجلس النّيابي، بينما الأستاذ جوهر بن مبارك كان لحدّ تكوين حكومة إلياس الفخفاخ يقوم بدور facilitateur للوصول لتشكيلة حكوميّة ما فيهاش "قلب تونس" حزب السيّدة الرّئيسة سميرة الشوّاشي ! سي جوهر بن مبارك وحتّى كان برشة مش باش يعجبهم كلامي، عندو ثنيّة شادّها وتقريبا ما خرجش منها: الدّفاع على الدّستور والحفاظ على مسار التحوّل الدّيمقراطي،وهذي حاجة باهية، وما يهمّوش مع شكون يكون وهذي حاجة برشة ناس يعيبوها عليه! وفي واقع الحال لقى نفسو في الصفّ الأوّل ووراه وحتّى حوله ناس مشكوك ياسر في عشقهم للدّيمقراطيّة ماضيا وحاضرا! الوجه الآخر إلّ متصدّر المشهد هو ال facilitateur الثّاني سي الحبيب بوعجيلة إلّ عندو زادة palmarès متاع إنتقالات من ال PDP )الجمهوري حاليّا( إلى حزب المرزوقي إلى محلّل سياسي ثمّ وسيط في تشكيل حكومة إلياس الفخفاخ وقبلها حكومة الجملي... بيني وبينكم، هذيكة كانت أعزّ فترة سانحة لتفتيق مواهب التّنبير مش عندي بركة، عند زادة برشة من شعبنا السّمح! تتفكّروهم هاك الوفود داخلة خارجة، كساوي كحل ومراياتات وبرّاد تاي ماشي والآخر جاي وبعد... شيء! فسّخ وعاود! وفي المشاورات لتشكيل حكومة الفخفاخ، لقينا مرّة أخرى الثّنائي وتقريبا بنفس الخطاب: حكومة فيها القوى "الثّوريّة" )ومن ضمنهم النّهضة،ونخلّيلكم حريّة حطّان علامات الإستفهام والتعجّب بالقدر إلّ تحبّوا عليه( وإستبعاد حزب القروي وتحرير وثيقة حكم و...و... وبعد مديدة، النّهضة رجعت تحكي وتناور باش عشيرهم )اِيه هذاكة إلّ قالوا عليه حزب الفساد( يشارك في الحكم! وهذا طبعا أحسن دليل على "صدق نوايا" النّهضة وتمسّكها بالقوانين والدستور إلخ... في كلّ المظاهرات متاع "مواطنون ضدّ الإنقلاب"، صعيب ياسر باش أيّ حدّ يقنع حتّى صغير مازال كيف بدأ يحبي أنّ الجزء الطّاغي من المتظاهرين ماهمش النّهضة! ويكفي تسمع الشّعارات إلّ عمّال وتزيد تطغى وإلّ تتراوح بين "لا إلاه إلّ اللّه وسعيّد عدو اللّه" و"الشعب يريد النّهضة من جديد" وما نظنّش أنّها شعارات مُستلهمة من الدّستور وإلّ تنمّ على روح ديمقراطيّة عالية! والجماعة إلّ تنادي بعودة الدّستور أو حتّى إسقاط الإنقلاب تحسّهم، من أصواتهم، عاملين مجهور دوبل وتريبل باش يتسمعوا... من غير ما نتحدّثو على الإعتداء على الصّحافيّين والصّحافيّات... في مظاهرة نهار الجمعة، كيف العادة كان فمّة تشكّي من التّضييقات على الوصول )وهذا حقّهم ما ينازعهم حدّ في حريّة التنقّل والتّظاهر( وفي آخر العشيّة أعلنوا نيّتهم الإعتصام في شارع بورقْيبة وصار إلّ صار وكمّل عليهم البرد وتناقلت المواقع صور المعتصمين )في ظروف صعيبة( ومنهم الصّورة إلّ فيها الأستاذ جوهر بن مبارك والحبيب بوعجيلة ومسحة وجوههم تعلوها علامات خيبة الأمل على خاطرهم ربّما ما حسبوش مليح إمكانيّة نجاحهم في تركيز منصّة في قلب شارع بورقْيبة تعطيهم إمكانيّات كبيرة للظّهور والبقاء في المشهد. التّصويرة هذيكة،وبقطع النّظر على أنّها تنجّم تكون مينة متاع تنبير، تطرح مرّة أخرى سؤال: آش لمّ الشّامي على المغربي كيف ما يقولوا؟وكونهم يظهروا تقريبا وحدهم في الصّورة، يعنيش زعمة أنّ النّهضة إستغلّتهم وهي بدات تسعى للتّزعم بوجه مكشوف حركة معارضة سعيّد. المالطي وشريكو...
منير الفلّاح
